HUMBERTO GONZALI

Nótase que no tocantes a la llingua del país toca despropósitu un día sí y l'otru tamién. ¡Guapa la racha que llevamos!. Foi qu' entamaren los "peculiares" a meter peseta nesti tema pa que tornaren les filigranes d'otru tiempu. Agora tóca-y a Sabino Fernández Campo, Conde de Latores, ex xefe de la Casa Real. A esti home nun-y manca decir que "ye esaxerao que se quiera poner una escuela de bable", o  que "l'asturianu convién conservalu como una cosa íntima, como'l que tien una cosa importante na so casa, almírala y consérvala". Unu, lo de la escuela nin lo comenta porque inevitablemente decátase de que'l señor conde yá ta mui mayor. Lo de la cosa íntima, suena a xarrón de la güela a guardar tres d'un cristal y, les coses como son, tamién me trai al maxín esi cantar onde se diz "les vaques del mio prau lléndoles yo". Pues eso, que la vieyura delles veces fai eses falcatrues col pensar, y que col mio "bable" yo faré lo que me pete; como si me da por falalu más que'l castellanu. Eso sí, a lo último tolo venceyao a los Borbones ta enraxonándome un daqué. Nun quixeron cellebrar la victoria de Bailén porque apremiaba Palma de Mallorca, les vacaciones, y l'abrazu con camiseta al caudillu Chávez. Más el bon rollu del monarca colos heraldos del socialismu zapateril. Más un conde necesitáu de tratamientu. Más demasiaos otros. La verdá, hai temporaes que me cuesta bien d'ello nun me declarar de toes toes republicanu.

L'estáu yá ta en númberos colloraos. Y el señor Solbes, el que tamién fuera ministru d'economía nel últimu gobiernu del compañeru Felipe, reconoz qu'esti déficit va llegar al conxuntu de les alministraciones públiques. El gobiernu del talante, que non del talentu, llogró bien aína empufanos a tolos ciudadanos. Pero eso sí,  háilos que tovía nagüen pola Nueva España del malabarista de la Z. Y nun tenemos de dir mui llueñe. Va bien poco un ciudadanu, qu'exerce d'asturianista y poeta del autobombu, taba toráu de tanto ponderar al presidente de los 400 euros y el café a preciu de Plan de Desarrollu. Pero claro, pa la intelectualidá orgánico los pufos qu'acabaremos pagando tolos los españoles nun son  cosa tala. Por malamente que tean les cuentes del estáu siempres habrá subvenciones, y subvencionables.

El recursu a la vieya política, onde too ye vieyu ideariu, vieya revolución, vieya tierra o vieya nobleza tien, amás d'un aquello a xeriátricu, poco de nuevo o de funcionamientu xustu cola xente qu'importa; eso que nomamos El Pueblu. Echémos-y una güeyada a la realidá política asturiana que tamos viviendo nos últimos años y analicemos si s'estrema muncho de l'anécdota  que paso a contar. Ello yera un vieyu emperador de la vieya China que-y diera al so primer ministru'l mandáu siguiente: Quiero qu'en diez díes Pequín tea allumbráu. Asuntu bien enguedeyáu, pues d'aquella Pequín quedaba na más grande escuridá en cuantes atapecía. El primer ministru llamó al gobernador de la ciudá y repitió-y el mesmu mandáu del vieyu emperador. Toles calles de Pequín teníen una primer autoridá vecinal, responsable de tolo malo que per ellí pasaba. El gobernador llamó a los xefes vecinales de toles calles pequineses y mandó lo mesmo, masque d'otra manera: Quiero que cada ún de vosotros consiga que la so cai tea allumbrada, y a lo más tardar en nueve díes. Pasara yá un día. Los xefes vecinales aconceyaron y, a la mañana siguiente, llamaron al xefe de familia de cada casa y dieron esta orden: Quiero que, pa más seguridá de tol mundu y pa más guapura de la ciudá, curie cada ún de vosotros d'allumbrar la so casa, en non más d'ocho díes. Y nel día que lo mandara'l vieyu emperador, tou Pekín, per primer vegada aquella nueche, vióse de toes toes allumbráu. Entós el vieyu emperador premió al so primer ministru, el primer ministru premió al gobernador de Pequín y el gobernador premió a los xefes vecinales. Pero, vaya por Dios, los que nun recibieron premiu nengún fueron los dueños de les allumbraes cases de Pequín.