HUMBERTO GONZALI

El de Xixón ye'l primer Ayuntamientu que fizo públicu'l patrimoniu de los sos conceyales. Fízose acompañáu d'un enfotu por detallar la información cola máxima transparencia y claridá y, al empar, dióse-y a la política española un importante precedente na vida público del nuestru estáu. Esta iniciativa, pionera en tol Reinu ya calistrada d'un perfondu sentíu democráticu, ye resultáu de la solicitú fecha pol Partíu Popular. Y l'orixe d'esta decisión taba precisamente na necesidá de que la opinión público del conceyu de Xixón pudiera tener conocencia, ensin llendes, ensin obligase a percorrer enrevesaes víes alministratives, de los ingresos, patrimoniu y participación en sociedades de cualaquier triba de tolos ediles que conformen la Corporación Local. Y ye qu'esta medida fízose inda más necesaria después de la continuada serie de declaraciones del equipu gobiernu municipal sobre lo que percibíen o non los conceyales populares, como si éstos fueren unos "entes raros". El pasáu mes d'abril el grupu municipal del Partíu Popular remitiera un escritu a l'alcaldesa pidiendo la so autorización pa que se ficieren públicos los datos patrimoniales, en conociendo l'antecedente del usu de comentarios insidiosos, dichos nos plenos dende'l gobiernu municipal de la izquierda, intentando, como ye vezu nelli, confundir a la ciudadanía con falsedaes sobre les dietes y los ingresos. L'Ayuntamientu de Xixón necesitaba un exerciciu de tresparencia, de cercanía colos ciudadanos, d'apertura democrática, y el Partíu Popular propiciólo col so facer demandando claridá y disponibilidá d'información a la propia alcaldesa, que ye la que determinaba si se podía o non consultar los espedientes relacionaos con esti tema, y considerando qu'hasta aquel momentu nun se conocía a nengún ciudadanu que tuviera accesu a éstos. El nuestru grupu municipal nunca nun tuvo problema n'asoleyar el so patrimoniu ya ingresos, cenciellamente porque nunca nun tuvo un res que tapecer. Y non solo eso, llogró que'l restu de los grupos municipales tamién dieran a conocer les sos retribuciones y bienes. Amás, afitóse'l casu del nuestru Ayuntamientu como referente pa otres corporaciones. Asina, vemos como'l nuestru modelu de bon facer democráticu emplegóse n'Uviéu onde, a lo cierto, el so alcalde aprovechó pa recordar que yá cumpliera la edá de xubilación, los 65 años, y que polo tanto pensaba qu'había de dar exemplu, y poro yá nun-y pagaríen el sueldu nin la seguridá social dende les arques municipales, colo que Gabino de Lorenzo permitía que más de 84.000 euros al añu revirtieran en beneficiu de los carbayones. España afáyase nuna coxuntura de crisis cada vuelta más perceptible. Gúei yá podemos falar de recesión, pues el crecimientu económicu español ye cuasi cero. En situaciones de crisis, cuando los ciudadanos pásenlo mal, son los máximos representantes de les instituciones los primeros llamaos a amosar actitúes edificantes. Paz Fernández Felgueroso, l'alcual alcaldesa de Xixón, fai años que perpasó la edá que se determina pal aniciu de les xubilaciones. Diba ser bono, dende la coherencia siempres esixible y dende la solidaridá colos ciudadanos de Xixón que s'enfrenten a una época de vaques flaques, que tamién ella supiera tener l'honrosu xestu de renunciar al so suelu. La política nun ha ser otra cosa que la conducción de los asuntos públicos pal provechu de los particulares, los nuestros ciudadanos xixoneses nesti casu.

Esbilla | del.icio.us